Minor inter partes é a segunda parte da triloxía que se iniciou con Baleiro e, en certo xeito, sucede despois. Baleirados os símbolos e os seus significados, baleirados os discursos e os relatos o público acompañará a Ensalle e Juan Navarro á “trastenda” daquel estudio cutre de televisión, ao backstage daquel “reality fake”. 

E que queda despois dese baleirado? Pois, seguramente, un oco, un buraco que é unha invitación. 

Nesta peza o baleiro non se expón, compártese. 

O buraco que deixa o baleiro será o primeiro elemento deste novo mundo e reuniranos como unha fogueira, como un oasis. Non hai creadores e público, hai habitantes no baleiro dando a benvida aos seus novos veciños. Imos compartir os costumes, a linguaxe, os ritos, as celebracións e os exercicios 
matutinos que se desenvolven neste lugar ao virar a esquina. 

Minor inter partes é un fogar que non existe máis que na nosa imaxinación e nos nosos corpos e teremos que construílo xuntos. Invitámosvos a que 
formedes parte da fundación deste re-mundo deste re-xurdir. 

En Minor inter partes queremos felicitarvos de antemán pola ousadía de vir. 

Cando foi o teu último desprendemento?